Mərhum şair Ələddin İncəlinin 92 yaşı tamam oldu. Ruhu şad olsun. Bir şeirin tarixçəsini paylaşmaqla Ustadın ruhuna ehtiramımı bildirirəm. O dünyası cənnət olsun.

  O zamanlar mən Qazaxda yaşayırdım. O zamanlar dünya mənim üçün ağ kağız idi. O zamanlar mən o kağızda nə istəsəm yaza bilərəm deyə düşünərdim. Duyğularım təmiz idi. Nə yağış, nə külək, nə toz görməmiş əsrarəngiz yaz təbiəti kimi idi duyğularım. Unudulmayan söz eşidəndə, əsl insan, əsil insan görəndə dünya mənə hədiyyə olunardı sanki. Nə isə... Çox yazıb sizləri yormaq niyyətində deyiləm. Niyyətim bir şeirin xatirəsini sizlərlə bölüşməkdir. Dayım televiziya kanallarına dəvət olunardı. Mən də bu xəbəri eşidən kimi atama bir kaset aldırardım. Ya mən, ya da ki, qardaşım dayım olan ədəbi verilişləri kasetin yaddaşına köçürərdik. Biz bunu ürəyimizin səsi ilə edərdik. Və həmin verilişdən dayımda olmasa idi, biz o kaseti dayıma hədiyyə edərdik. Sən demə biz əməlli-başlı xoşa gələn bir missiyanı yerinə yetirirmişik. Günlərin bir günü dayım mənə dedi ki, bazar günü Ələddin İncəlini İTV-də yayımlanan “Ovqat” verilişində göstərəcəklər. Vaxtınız olsa onu da yazarsız kasetə. Mən də dayımın sözünü tutdum. “Ovqat” verilişi kasetin yaddaşına köçürüldü. Kaset dayımın vasitəsilə Ələddin İncəliyə çatdırıldı. Ələddin müəllim də sağ olsun, bu diqqətin əvəzində mənə bir şeir yazıb hədiyyə etdi. Şeir yenə də dayımın vasitəsilə mənə çatdırıldı. Həmin şeiri sizlərin diqqətinə çatdırıram:

SƏBİNƏ  XANIMA TƏŞƏKKÜR

“Ovqat”ı kasetə almaqla, mənə,
Deyimmi neyləyib Səbinə xanım?-
Bir şair ömrünün ən xoş anını
Ekranda əyləyib Səbinə xanım!..

Video lentinə aldığı “Ovqat”
Şairə ən böyük sovqatdı-sovqat!
Bunu mənə dedi dayısı Barat,
Ona da söyləyib Səbinə xanım!..

İncəli sözünü birbaşa deyir,
Dildən-dilə gəzə-dolaşa deyir.
Sənə də çox sağ ol, çox yaşa deyir
Təşəkkür eyləyir, Səbinə xanım!..

 Səbinə Yusif,
"CARÇIOGLU GROUP" MMC-nin mətbuat xidmətinin rəhbəri,
 Azərbaycan Jurnalistlər Birliyinin
və "Qazax" Xeyriyyə İctimai Birliyinin üzvü