ATİA.AZ  saytı izləyicilərinə bolgələrimizdə yaşayan yaradıcı insanlardan olan, şairə, "Fəxrimiz" Milli Mükafatlandırma layihəsinin qalibi Aslanova Adilə Nəcməddin qızı haqqında qısaca məlumatı çatdırır.
   Aslanova Adilə Nəcməddin qızı Zaqatala rayonunun Lahıc kəndində anadan olub.  BDU- nun filologiya  fakültəsini bitirib.  1980 - illərdən dövrü mətbuatda çap olunur.  2 kitabı Azərbaycanda, 1 kitabı İranda- Təbriz şəhərində nəşr olunub.
Yaxın günlərdə  keçirilən " Fəxrimiz" Milli Mükafatlandırma layihəsinin qaliblərindən biri olub.  Dördüncü kitab üzərində işləyir.
Uğurlar arzulayaraq Adilə xanımın sənət bağçasından bir yarpaq təqdim edirik:

      Sabah bazar günümdü

   Səndən sonra nə varsa
   Doğradım muncuq- muncuq.
   Bir gözüm payız oldu,
   Bir  əlim də qabarcıq.

   Bağladım pəncərəmi
   Gecənin pərdəsiylə.
   Edam etdim ruhumu
   Bir bayquş nəğməsiylə.

   Qırpmadım heç gözümü,
   Gözüm gözümdən düşdü.
   Sevirdim əllərimi,
  O da üzümdən düşdü.

   Yaxında qonşu qadın
   Ərini qarğıyırdı.
   Tənha qalan bir qərib
   Dul gəlin ağlıyırdı.

   Küçədə " xoşbəxt"  itlər
   Kimə gəldi hürürdü.
   Kif atmış boz ümidlər,
   Küçələrdə ölürdü.

   Gecə daha nə gördüm,
   Gözlərimə zülümdü.
   Çəkirəm  pərdələri,
   Sabah bazar günümdü...

    AYGÜN SADİQ,
   ATİA.AZ