Biraz uzaq dur məndən,
Biraz darıxdır məni.

Qoy intizar qalım sənə,
Catışmayan nəfəs kimi.
Qoy həsrətin sıxsın məni,
Dar,qaranlıq qəfəs kimi.

Biraz uzaq dur məndən,
Yoxluğunu bilim sənin.
Arayım dəli kimi,
Yanına gəlim sənin.

Biraz sənsiz burax məni,
Xatirənlə alışım.
Həsrət qalım gözlərinə,
Həsrət qalım gülüşünə,
Xəyalınla danışım.

Biraz uzaq dur məndən,
Axı istəmirəm adiləşəsən.
Qorxuram könlümə qoyduğum yerdən,
Aşağı enəsən,yer dəyişəsən.
Qorxuram bənzərsən sən də hər kəsə,
İtər mənim üçün sirrin,sehirin.
Dəyişər könlümdə möhtəşəm yerin.

Bir bilsən səninçün darıxmaq nədir,
Kaş bilsən qəlbimi necə göynədir.
Biraz uzaq dur məndən,
Dəyərini bilim sənsiz.
Nə dinclik,rahatlıq tapım,
Nə danışım,gülüm sənsiz,
Qoy darıxım,ölüm sənsiz...

Gilə Əliqızı