Müasir dünyada beynəlxalq təhlükəsizliyin qorunması, dövlətlər arasında etimadın möhkəmləndirilməsi və qarşılıqlı əməkdaşlığın genişləndirilməsi xüsusi əhəmiyyət daşıyır. Geosiyasi gərginliklərin artdığı, beynəlxalq hüququn norma və prinsiplərinin qorunmasının aktuallaşdığı bir dövrdə Azərbaycanın bu istiqamətdə həyata keçirdiyi siyasət və irəli sürdüyü təşəbbüslər ölkəmizin beynəlxalq nüfuzunu daha da gücləndirir.

     Oktyabrın 15-də Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Zirvə Görüşünün keçirilməsi Azərbaycanın beynəlxalq əməkdaşlıq məkanındakı mövqeyinin mühüm göstəricisi oldu. Zirvə Görüşündə çıxış edən Möhtərəm Prezident                İlham Əliyev ölkəmizin xarici siyasətinin əsas prinsiplərini, regional əməkdaşlığın əhəmiyyətini və beynəlxalq münasibətlər sistemində mövcud problemlərə dair Azərbaycanın mövqeyini diqqətə çatdırdı. 

     Möhtərəm Prezident cənab İlham Əliyev çıxışında Azərbaycanın coğrafi mövqeyinin yaratdığı imkanlara toxunaraq bildirmişdir: “Coğrafi olaraq Asiya ilə Avropanın kəsişməsində yerləşən Azərbaycan Avrasiya məkanında birləşdirici mərkəz kimi getdikcə daha böyük rol oynayır.” Bu fikir Azərbaycanın yalnız əlverişli coğrafi mövqeyə malik dövlət deyil, həm də müxtəlif regionları birləşdirən, nəqliyyat, enerji, iqtisadiyyat və humanitar sahələrdə əməkdaşlığın inkişafına töhfə verən mühüm tərəfdaş olduğunu ifadə edir. Ölkəmizin beynəlxalq nəqliyyat dəhlizlərinin inkişafında iştirakı və müxtəlif dövlətlərlə qurduğu əlaqələr onun regional və qlobal əhəmiyyətini artırır. 

     Möhtərəm Prezident İlham Əliyev beynəlxalq münasibətlərdə hüquq bərabərliyinin və ədalətli yanaşmanın vacibliyini vurğulayaraq demişdir: “Azərbaycan davamlı olaraq bərabərhüquqluluq, daxili işlərə qarışmama, ölkələrin ərazi bütövlüyünün və suverenliyinin üstünlüyünə əsaslanan müstəqil xarici siyasət həyata keçirir.”  

     Dövlətimizin başçısının bu mövqeyi Azərbaycanın müstəqil xarici siyasət kursunun mahiyyətini aydın şəkildə əks etdirir. Beynəlxalq hüquqa hörmət, dövlətlərin suverenliyinin tanınması və ikili standartların aradan qaldırılması davamlı sülhün təmin olunması üçün mühüm şərtlərdir. Azərbaycanın öz milli maraqlarını qətiyyətlə müdafiə etməsi və beynəlxalq platformalarda prinsipial mövqe nümayiş etdirməsi də məhz bu yanaşmaya əsaslanır. 

     Çıxışında ölkəmizin keçdiyi mübarizə yoluna toxunan Möhtərəm Prezident İlham Əliyev Azərbaycanın ərazi bütövlüyünü və suverenliyini bərpa etməsinin tarixi əhəmiyyətini vurğulamışdır. Dövlətimizin başçısı bildirmişdir ki, beynəlxalq qərarların icrasını təmin edən mexanizmlərin mövcudluğu münaqişələrin qarşısının alınması baxımından vacibdir. Cənab Prezidentin bu fikirləri beynəlxalq təhlükəsizlik sistemində hüquqi məsuliyyətin və ədalətli yanaşmanın əhəmiyyətini bir daha önə çəkir. 

     Möhtərəm Prezident İlham Əliyevin çıxışında sülhün qorunması məsələsi də xüsusi yer tutmuşdur. O, Azərbaycanın sülhə üstünlük verdiyini və əldə olunmuş sabitliyin qorunmasının vacibliyini qeyd edərək demişdir: “Biz sülh təklif etdik və bir ildən bir az çoxdur ki, sülh içində yaşayırıq. Bu sülh hələ də kövrəkdir, onu qorumaq və möhkəmləndirmək lazımdır.”  

     Bu fikirlər Azərbaycanın gələcəyə yönəlmiş siyasi yanaşmasını ifadə edir. Sülhün möhkəmləndirilməsi yalnız dövlətlərin bəyanatları ilə deyil, qarşılıqlı etimadın yaradılması, beynəlxalq hüquqa hörmət və əməkdaşlığın ardıcıl inkişafı ilə mümkündür. 

     Zirvə Görüşündə AQEM-in fəaliyyətinin gücləndirilməsi, üzv dövlətlər arasında əməkdaşlığın genişləndirilməsi və təşkilatın gələcək inkişafı məsələləri də diqqət mərkəzində olmuşdur. Azərbaycanın sədrliyinin daha iki il müddətinə uzadılması təklifinə üzv dövlətlərin dəstək verməsi ölkəmizə göstərilən etimadın mühüm ifadəsidir. Bu, Azərbaycanın beynəlxalq təşəbbüslərinin dəstəkləndiyini və təşkilat çərçivəsində əməkdaşlığın inkişafına verdiyi töhfələrin yüksək qiymətləndirildiyini göstərir. 

     Bakı Zirvə Görüşü bir daha sübut etdi ki, Azərbaycan beynəlxalq münasibətlərdə etibarlı tərəfdaş, dialoq təşəbbüskarı və sülhün möhkəmləndirilməsində maraqlı olan fəal dövlətdir. Möhtərəm Prezident İlham Əliyevin rəhbərliyi ilə həyata keçirilən ardıcıl xarici siyasət ölkəmizin beynəlxalq nüfuzunun artmasına, milli maraqlarının qorunmasına və qarşılıqlı faydalı əməkdaşlığın genişlənməsinə xidmət edir. 

     Beləliklə, AQEM-in VII Zirvə Görüşü Azərbaycanın diplomatik uğurlarının və beynəlxalq əməkdaşlığa sadiqliyinin mühüm təzahürüdür. Bakıdan səslənən mesaj aydındır: davamlı sülhün, təhlükəsizliyin və inkişafın əsasını qarşılıqlı etimad, suverenliyə hörmət və ədalətli əməkdaşlıq təşkil edir. 

Esmira Şıxməmmədova

YAP Qazax rayon təşkilatı ərazi partiya təşkilatının sədri