İslam hüququna, Quran məntiqinə görə öldürücü isti ilə bağlı Həccin, insanların həyatına ölüm təhlükəsi yaradan ayinləri dərhal təxirə salınmalı idi. 1979 - ci ildə Cuheymin əl Uteybinin Kəbə üsyanı zamanı Fransa xüsusi təyinatlılarına kağızdan kəlimeyi şəhadət oxudub məscidə daxil olmağa fətva vermişdi Səud şeyxləri. Onlar da Kəbəyə daxil olub zirzəmiyə su buraxaraq sonra da elektrik cərəyanı verib üsyançıları zərəsizləşdirmiş, həbs etmişdilər. Onlardan əvvəl Səudiyyə Ərəbistanı hökuməti top və tank mərmiləri ilə Kəbənin ətrafındakı minarələri atəşə tutur, təyyarədən məscidi bombalayırdılar. Fəqət bu zaman sığınacaq qismində məscidin zirzəmisində gizlənən üsyançıların yerinə su buraxıb cərəyan vermək kimi plan onların ağlına gəlməmişdi. Hətta Pakistanın xüsusi təyinatlıları da bir iş görə bilməmişdi.

İndi 1000 dən artıq Həcc ibadətini icra edən müsəlman istidən həlak olub. Vaxtilə zərurət yarandığı üçün qeyri - müsəlman olan Fransa əsgərlərinin müqəddəs Kəbə məscidinə daxil olmasına fətva verən Səud şeyxləri, üləmaları niyə fətva vermirdi ki, zərurət zamanı rüxsət var. Üsuli fiqhin hökmi - sanəvi meyarına görə ölüm təhlükəsi olduğu üçün ibadətin müəyyən hissələri təxirə salınmalı idi. Əgər daha ciddi zərurət yaranarsa ümumiyyətlə Həcc təxirə salınmalı idi. Necə ki, iki il əvvəl Covid 19 pandemiyası zamanı Kəbənin qapısını bağlamışdılar və Həccə ibadəti də çox məhdud halda icra edilmişdi. 

Əgər həkim desə ki, sən 50 dərəcə istinin altında 10 dəqiqə namaz qılsan ölüm təhlükəsi var. Qulaq asmayıb qılsan və ölsən intihar etmiş hökmündəsən. Əgər Səud hökumətində hava haqqında məlumat haram sayılırsa heç olmasa başqa ölkələrin proqnozlarına, ehtimallara əsasən tədbir görməli idilər və din alimləri fətva verməli idilər.

Təhlükə zamanı, insan həyatına zərər gəlmə ehtimalı yaranarsa ibadət mümkün icazə verilən üsulda icra edilir, yaxud təxirə salınır. Tutaq ki, Sübh namazını qılan adam görsə ki, bir nəfər qapısı bağlı evin içində yanır, kömək istəyir, namaz qılan adama vacibdir ki, namazı təxirə salıb dərhal adamı xilas üçün cəhd etsin. Bunun nəticəsində namazı qəza olsa bunun günahı yoxdur.

Yaxud ayaq üstə namaz qılması mümkün olmayan şəxs oturub qılar. Otura da bilmirsə uzanıb qılar. Əgər hərəkət edə bilmirsə göz işarəsi ilə (ima ilə) qılar.

Əgər üləma düşünübsə ki, hansısa ayini təxirə salmaq fətvası versək ola bilsin, o şəxslərin öz məzhəb baxışlarına görə Həcc ibadəti tam sayılmamış olar, bu yanlışdır. Ona görə nəticədə 1000 adam öldü və minlərlə adamın da Həcci yarımçıq qaldı. Elə bundansa əvvəlcədən fətva verilməli idi ki, ölüm təhlükəsi olduğu üçün filan ayinlər təxirə salınır.

Allahın məqsədi adamları aparıb 52 dərəcə istidə qırmaq deyil. Orada ölənlərin balasını yetim qoymaq, ailəsini başsız qoymaq deyil. Onları Allah yox, başsız əllamələr, şeyxlər öldürdü. İslamı bax beləcə xurafata çeviriblər. Camaat da müticəsinə tabe olub onlara. Ərəb şeyxləri də camaatı xilas etmək əvəzinə kondisionerli otaqlarda oturub istidən ölən zəvvarların meyitlərinin daşınmasını seyr edir canlı yayımda... 

Peyğəmbər hava isti olanda 5 vaxt namazın vaxtlarını müştərək vaxtda, yəni 3 vaxtda qılırdı. Allahın məqsədi insanlara zülm etmək deyil.

Hazırda Məkkədə ölən şəxslərin təqlid etdikləri müctəhidlər, şeyxlər, yaxud Səudiyyənin din böyükləri fətva verib müqəllidlərini başa salmalı idilər. Ancaq görünür beyinlər o qədər də operativ işləmirmiş... 

Allah ölənlərin hamısına rəhmət etsin.