Güzgüyə baxıram mat qalıram mən,

Qırış- qırış olub üz , qocalıram..

Dişlərim tökülür, saçım ağarır,

Dilimdə dolaşır söz , qocalıram..

Uşaqlıq illərim yadıma düşür,

Gözlərim önündən nələr ötüşür?

Bizim  də ömrümüz sona yetişir,

Artıq zəif görür göz , qocalıram.

Elə duyğulanıb kövrək olmuşam,

Qayğılarım artıb, yaman dolmuşam.

Cavabsız sualla təkcə qalmışam,

Məndən  qalacaqmı  iz,  qocalıram?

Necə də sürətlə gedir vaxt- zaman,

Bu gündən sabaha qalmayır güman.

Arzular gül aça, çəkilə duman,

Taqətdən düşübdür diz , qocalıram.

Oğlum var, qızım var, şükür Allaha,

Ümidlə baxıram bu gün, sabaha.

Mələyəm, naşükür olmaram daha,

Ömrüm- günüm gedib tez,  qocalıram.