Təhsildə Rayət müəllim, poeziyada Rayət Əli kimi tanınan Rayət müəllim haqqında  mətbuatda, müxtəlif sosial şəbəkələrdə,  təhsil saytlarında kifayət qədər məqalələr, məlumat və yazılar verilmişdir. Amma bu gün bir qabaqcıl, veteran müəllim kimi  onun da peşə bayramıdır. Odur ki, bu müqəddəs Peşə Bayramı günü ilə bağlı saytımızda onun haqqında bir yazı yazmağı özümə borc bildim.
     Əliyev Rayət Səhlədar oğlu   1960-cı ildə Qazax rayonu Kosalar kəndində anadan olub. 1982-ci ildə Azərbaycan Dövlət Bədən Tərbiyəsi və İdman Akademiyasını fərqlənmə diplomu ilə bitirib və elə həmin ildən pedaqoji fəaliyyətə başlayıb.
     İşlədiyi müddət ərzində peşəsini sevən və həvəslə çalışan Rayət müəllim  nəinki rayon, ölkə üzrə bir çox uğurlara imza atmağa nail olub.
Təhsil üzrə nümunəvi dərslərini, pedaqoji təcrübəsini yayan Rayət müəllim ölkənin ilk  "Fiziki tərbiyə marşı"nı və  "Azərbaycan İdmanı" dastanını nəzmlə yazaraq ictimaiyyətin ixtiyarına verib.  Rayət müəllim təhsillə bərabər idman sahəsində də işlərini uğurla davam etdirir. Onun rəhbərlik etdiyi "Qazax Gənclər" FK-nın uğurları göz qabağındadır.
     Ən maraqlısı odur ki, Rayət müəllim bütün bu işlərlə bərabər həm də poeziya adamıdır.  Onun bu sahədə də uğurları kifayət qədərdir.
3 kitab və bir çox məqalələrin  müəllifi olan Rayət müəllimin yazmış olduğu  "Azərbaycan idmanı" dastanı ölkəmizdə nəzmlə yazılan ilk əsərdir.
    Təhsil və idmanda uğurlarını nəzərə alan Elm və Təhsil nazirliyi onu  "Qabaqcıl Təhsil İşçisi" döş nişanı, Gənclər və İdman nazirliyi isə "Azərbaycan Respublikasının Fəxri Bədən Tərbiyəsi və İdman İşçisi"  döş nişanı ilə təltif etmişdir.
    Biz də ATİA.AZ saytının yaradıcı kollektivi adından  təhsili, idmanı və poeziyanı mükəmməl olaraq özündə birləşdirən Rayət müəllimi peşə bayramı olan "Müəllimlər günü"  münasibəti ilə təbrik edir, ona can sağlığı, uzun ömür və gələcək fəaliyyətində yeni -yeni uğurlar arzulayırıq.


ATİA.AZ saytının baş redaktoru
AYDIN ADIGÖZƏLLİ