ABŞ-nin Los-Anceles şəhərində mağazanın dayanacağında adamyeyən görüntülənib.

29 yaşlı evsiz Kolin Çex ərzaq mağazasının dayanacağında tanımadığı şəxsə hücum edib. O, kişinin başını asfalta çırpmağa başlayıb, sonra isə əyilib onun üzünü yeməyə başlayıb. Hadisənin şahidləri polisə müraciət ediblər. Polis əməkdaşları hadisə yerinə gələndə Çexin qurbanın üzərinə əyildiyini görüblər. Onun əlləri, üzü və paltarları qan içində olub. Sonradan məlum olub ki, Çex kişinin qulağını və gözünü yeyib. Qurbanın daha sonra Kennet Braun olduğu müəyyən edilib: onu xilas etmək mümkün olmayıb. Braun başının asfalta çırpılması nəticəsində aldığı travmalardan vəfat edib.

Çex həbs olunarkən hüquq-mühafizə orqanlarının əməkdaşlarının heç bir sualına cavab verə bilməyib. Cinayətkar nəzarət altına götürülüb, sonra isə huşunu itirdiyi üçün xəstəxanaya göndərilib. Daha sonra Çex müstəntiqlərə evsiz olduğunu və son beş gün ərzində yatmadığını, hansısa varlığın ona hakim olduğunu bildirib. Çex həmçinin qeyd edib ki, guya ilk olaraq Braun ona hücum edib, o, özünü qulyabanı ilə döyüşürmüş kimi hiss edib və ilahi güc ona qalib gəlməyə kömək edib. Kişi başındakı səslərin ona hansısa Dreykə hücum etməyi əmr etdiklərini və Braunu onunla səhv saldığını deyib. Çex həmçinin hücum üçün dişlərini istifadə etdiyini etiraf edib.

Onun işi üzrə keçirilən ilk məhkəmə iclası zamanı həmin şəxs özünü qəribə aparıb və mimikaları tez-tez dəyişib. Çexin vəkili məhkəmədə onun ruhi xəstə olduğunu deyib. Kişi psixiatrik müayinədən keçəcək. Növbəti iclas mayın 24-nə təyin edilib.