Ukraynada könüllü qadınlardan ibarət PUA bölməsi yaradılacaq. Bu bölmə Ukrayna Müdafiə Qüvvələri ilə sıx inteqrasiya şəraitində pilotsuz aviasiya sistemləri ilə məşğul olacaq. Bu barədə “Orden Santyaqo” dronlarının rota komandiri İqor Lusenko “Facebook” səhifəsində məlumat verib: “Bu, (nisbətən) mürəkkəb sistemlərlə işləri əhatə edir ki, texniki savad, diqqət və dəqiqlik, baza mühəndislik bacarıqları və yaradıcı taktiki düşüncə tələb edir”, - deyə o bildirib.

Bölməyə 18 yaşdan yuxarı xanımlar qoşula bilərlər. PUA-ların və ya oxşar sistemlərin idarə edilməsi, istismarı, təmiri, texniki xidməti sahəsində bilik və təcrübə meyarları üstünlük kimi qiymətləndiriləcək.  
 
“Həmçinin, təbii ki, istehkamçılıqdan tutmuş həkimliyə və ya atıcılığa qədər, hərbi bacarıqlar, proqramlaşdırma, texniki ixtisaslar (elektronika, radio və s.) üzrə iş təcrübəsi də üstünlük olacaq. Amma öyrənmək istəyi və komandaya uyğunlaşmaq əsasdır”, - deyə Lusenko qeyd edib.

Məlumata görə, müraciət etmək istəyənlər müvafiq “Google” formasını dolduraraq ərizələrini təqdim edə bilərlər.
Ərizələr təqdim edildikdən sonra rəqabətli seçim aparılacaq və namizədlərin bölmə daxilində döyüş tapşırıqlarını yerinə yetirmək qabiliyyətləri müəyyən ediləcək. Həmçinin təlim, Ukrayna Təhlükəsizlik Xidməti tərəfindən yoxlamalar və nəhayət, bölməyə qəbulla bağlı yekun qərar nəzərdə tutulub.

İqor Lusenko eyni zamanda kişilərin də müraciət edə biləcəyini əlavə edib: “Orduda xidmət etmək və PUA-larla işləmək istəyən kişilər, məlumatlarınızı eyni formada təqdim edin, sizin üçün seçimlər edilə bilər”, - deyə o bildirib.