"Müasir dünyada informasiyadan bir silah kimi istifadə edilir" - bunu "Ayna"-"Zerkala" qəzetlərinin baş redaktoru Elçin Şıxlı deyib.

Onun sözlərinə görə, müasir dövrdə media müxtəlif maraq qruplarının toqquşma məkanına çevrilib:

"Kimin kiminləsə hər hansı bir problemi, toqquşan maraqları varsa, yaxud da hansısa siyasi platformada yola gedə bilmirlərsə, "feyk" informasiyalardan istifadə olunur".

 

Elçin Şıxlı bildirib ki, belə informasiyaların yayılmasının qarşısını almağın çətinliyini vurğulayıb:

"Bu gün informasiya bolluğu şəraitində yaşayırıq. Yayılan informasiyaların hansının doğru, hansının yalan olduğunu anlamaq üçün gərək səhərdən axşama kimi məlumatları oxuyasan ki, nəyin doğru, nəyin yalan olduğunu anlayasan. Ona görə də "Media savadlılığı" deyilən bir məfhum meydana çıxır. Bu səbəbdən media üçün insanları savadlı etmək istəyirik". 

Jurnalistin fikirincə, yoxlanılmamış məlumatların yayılması savadsızlıqdan və jurnalistikanın nə demək olduğunu anlamamaqdan irəli gəlir:

"Yeni dəb yaranıb - məlumata həqiqət yükü olmayan hay-küylü bir başlıq qoyurlar. Başlıqla mətn uyğun gəlmir. Eyni zamanda, oxunuş sayının artırılması məqsədi ilə yalan məlumat yayırlar". 

İnformasiyanın təhlil edilməsi prosesinə gəlincə, Elçin Şıxlı hesab edir ki, məlumat bir dəfə yayılır:

"Ondan sonra axtarılıb-araşdırılıb həqiqət üzə çıxarılırsa belə, ilk yayılan informasiya insanların yaddaşında qalır. Ondan sonra informasiyanın araşdırılması, təhlili, həqiqətə uyğun olub-olmaması haqqında kiminsə məlumat alması şərt deyil. Özü də onu 10 nəfərdən 5-i belə oxumur. Bu, mürəkkəb bir məsələdir".