Qazax rayon İcra Hakimiyyətinin başçısı Rəcəb Babaşovun haqqında son vaxtlar artan kütləvi etirazlara, çoxsaylı şikayətlərə görə narahat göründüyü hiss olunur. Məlumatlar dolaşır ki, rayon sakinlərinin dövlətdən narazı salınması səbəbindən yuxarılarda da onun fəaliyyətinə münasibət birmənalı deyil. Son dövrlər Dövlət Təhlükəsizliyi Xidmətinin icra başçılarına qarşı təşkil etdiyi əməliyyatların Qazax rayonunda da həyata keçiriləcəyi ehtimalı hər ötən gün daha da güclənir. Bu səbəbdən ola bilər ki, Rəcəb Babaşov qohumlarının adına qeydiyyata alınmış biznes əmlaklarını satır, bir növ "çamadan" əhval-ruhiyyəsindədir.
Belə ki, Qazax rayonunda fəaliyyət göstərən və rayon İcra Hakimiyyətinin başçısı Rəcəb Babaşova yaxınlığı ilə bilinən fermer təsərrüfatının satıldığı bildirilir.
Belə ki, 22.04.2021-ci il tarixində Dövlət Vergilər Xidmətinin reyster məlumatlarında bununla bağlı müvafiq dəyişiklik aparılıb.
 “Qazax rayonu Birinci Şıxlı Kəndli Fermer Təsərrüfatı” MMC-nin qanuni təmsilçisi (direktoru) Babaşov Emin Məmmədqulu oğlunun yerinə Əliyev Ərşad Ədalət oğlu təyin olunub.

Məlumat üçün bildirək ki, Rəcəb Abas oğlu Babaşov ölkə başçısnın 19 may 2016-cı il tarixli sərəncamı ilə Qazax Rayon İcra Hakimiyyətinin başçısı təyin edilib. Rəcəb Babaşov Qazax Rayon İcra Hakimiyyətinin başçısı təyin olunduqdan cəmi 11 gün sonra “Qazax rayonu Birinci Şıxlı Kəndli Fermer Təsərrüfatı” MMC adlı şirkət dövlət qeydiyyatına alınıb. Nizamnamə kapitalı 100 manat olan şirkətin qanuni təmsilçisi Babaşov Emin Məmmədqulu oğlu olub.
Son 4 ildə Qazaxda minlərlə hektar torpaq sahəsində əkin əkən “Birinci Şıxlı Kəndli Fermer Təsərrüfatı” rayonun ən böyük təsərrüfatlarından birinə çevrilib.
Məsələn 2018-ci ildə Qazax rayonunda əkiləcək 990 hektar kartofun 250 hektarı və ya 1/4-i “Birinci Şıxlı Kəndli Fermer Təsərrüfatı”nın payına düşüb.
Həmin il “Birinci Şıxlı Kəndli Fermer Təsərrüfatı” 1502 hektar sahədə taxıl, 40 hektar sahədə isə tütün əkib.
Maraqlıdır ki, əvvəllər Vergilər Nazirliyində İri Vergi Ödəyiciləri Departamentinin rəisi işləyən Rəcəb Babaşov Qazax Rayon İcra Hakimiyyətinin başçısı təyin edildikdən 11 gün sonra yaranan və qısa müddətdə sürətlə böyüyən bu şirkətin başında əslən qazaxlı olmayan şəxs dayanıb.
“Birinci Şıxlı Kəndli Fermer Təsərrüfatı”nın qanuni təmsilçisi Babaşov Emin Məmmədqulu oğlunun İcra Başçısı Babaşov Rəcəb Abas oğlunun yaxın qohumu olduğu bildirilir.
Qeyd edək ki, əslən Sabirabad rayonun Qaralar kəndindən olan Rəcəb Babaşovun yaxın qohumu olduğu bildirilən Məmmədqulu Babaşov uzun illər Sabirabad rayonunda 35 saylı Yol İstismar İdarəsinin müdiri olub.
Hazırda həmin idarəyə Məmmədqulu Babaşovun oğlu Əliqulu Babaşov rəhbərlik edir. “Birinci Şıxlı Kəndli Fermer Təsərrüfatı”nın qanuni təmsilçisi Emin Babaşovun da Əliqulu Babaşovun qardaşı olduğu bildirilir.
Onu da bildirək ki, Rəcəb Babaşovun atası Babaşov Abas Əliqulu oğlu 1938-ci ildə anadan olub və kənddə Hacı Abas olaraq tanınır. Rəcəb Babaşovun bibisi oğlu Həsən Həsənov isə uzun illərdir Sabirabad rayon İcra Hakimiyyəti Başçısının birinci müavini vəzifəsində çalışır.
dialoq.info