Noyabrın 25-də ADA Universitetində Prezident İlham Əliyevin iştirakı ilə keçirilən “Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfrans bu gün də geniş müzakirə olunmaqdadır. İki saat yarımdan artıq davam edən konfransda cənab İlham Əliyev 16-dan çox sualı hərtərəfli və təfərrüatı ilə cavablandırdı. Dövlət başçısının çıxışı, eyni zamanda, konfrans iştirakçılarının suallarına cavabı Azərbaycanın bütün yeni çağırışlara hazır olduğunu dünyaya təqdim etdi. Həmin çıxışın əsasında Azərbaycanın hər zaman olduğu kimi, bu gün də sülhün və regional təhlükəsizliyin əldə olunmasında maraqlı tərəf, o cümlədən dünya dövlətləri üçün etibarlı tərəfdaş olduğu fikirləri dayandı. Əməkdaşlığa regional çərçivədən başlayan Azərbaycan illər keçdikcə bu əlaqələrin coğrafiyasını genişləndirdi. Bakı-Tbilisi-Ceyhan neft, Bakı-Tbilisi-Ərzurum qaz layihələri, əhəmiyyətinə görə enerji layihələrindən geri qalmayan Bakı-Tbilisi-Qars dəmir yolu layihəsi Azərbaycanı regional əməkdaşlığın aparıcı qüvvəsi kimi tanıtdı. Dövlət başçısı İlham Əliyev çıxışında da bu məqama xüsusi diqqət göstərərək bildirdi ki, Azərbaycanın coğrafiyası yaxşı məlumdur. Ölkəmizin açıq dənizə, okeanlara çıxışı yoxdur. Buna görə istər enerji, istərsə də nəqliyyat layihələrimiz olsun, hədəfimizə çatmaq üçün çox gərgin işləməli idik. Eyni zamanda, coğrafi mövqeyimizin üstünlüyü Avropa ilə Asiyanın arasında yerləşməyimizdir. Beş il bundan əvvəl tərəfdaşlarımızla birlikdə Bakı-Tbilisi-Qars dəmir yolu layihəsinin açılışını etdik: “İndi isə ölkəmizdən keçən artan yük həcmlərini gördükdə biz Bakı-Tbilisi-Qarsın Gürcüstan hissəsinin genişləndirilməsinə sərmayə yatırmağa başladıq. Bu layihə bizə 100 milyon ABŞ dollarından daha baha başa gələcək və biz bu layihəni bir il və ya ola bilsin, bir il yarım müddətində bitirməyi planlaşdırırıq. Eyni zamanda, Şimal-Cənub dəhlizi kimi digər nəqliyyat layihələri Şərq-Qərb dəhlizinə sinerji əlavə edəcək. Azərbaycan hər iki dəhlizin iştirakçısıdır və Azərbaycanda bu dəhlizlərlə bağlı əksər nəqliyyat və logistika infrastrukturu hazırdır. İndi biz nə işlər görürük. Biz müasirləşdirmə işləri aparırıq”
    Azərbaycanın etibarlı tərəfdaş kimi mövqeyinin möhkəmlənməsi müəllifi olduğu layihələrin coğrafiyasının genişlənməsində də özünün aydın ifadəsini tapır. Çoxtərəfli əməkdaşlığın başlanğıcı kimi dəyərləndirilən Cənub Qaz Dəhlizi layihəsinin, onun əsas seqmentləri olan TANAP-ın və TAP-ın perspektivləri bu gün də geniş müzakirə olunur. Cənab İlham Əliyev konfrans iştirakçılarının suallarını cavablandırarkən bu layihələrə də diqqəti yönəltdi.
    Bu gün Azərbaycan Cənubi Qafqazın lider dövləti olaraq regionda sülhün bərqərar olması üçün bütün imkanları nəzərdən keçirir. Xalqlar arasında iqtisadi, mədəni, siyasi, diplomatik əlaqələrin dərinləşməsi, insanların daha yaxşı, rifah içində yaşaması üçün yeni yanaşmaların tətbiq edilməsində əzmkarlıq nümayiş etdirir. Azərbaycanın regional əməkdaşlığın aparıcı qüvvəsi, dünyanın enerji təhlükəsizliyinin təminatçısı kimi artan rolu göz qabağındadır. Beynəlxalq iqtisadi münasibətlərin tənzimlənməsində nəqliyyat və kommunikasiya dəhlizlərinin rolu böyükdür. Bu baxımdan hazırda logistika dəhlizlərinin, kommunikasiya xətlərinin yenilənməsi ölkəmizi qarşıya qoyulmuş hədəflərə, sülhə daha da yaxınlaşdırır. Regionda dayanıqlı sülhə və təhlükəsizliyə nail olduqdan sonra yeni əməkdaşlıq formatlarının reallığa çevrilməsi qaçılmazdır.

Anar Nəbiyev
YAP Qazax rayon təşkilatının sədri