Bu gün ölkəmiz öz müstəqillik tarixinin ən şərəfli dövrünü yaşayır. Təməli Ümummilli Liderimiz Heydər Əliyev tərəfindən qoyulan müstəqil dövlət quruculuğu prosesi möhtərəm Prezidentimiz cənab İlham Əliyev tərəfindən yüksək fədakarlıqla, əzmkarlıqla davam etdirilir. Dövlət Başçımızın 19 illik rəhbərliyi sayəsində siyasi, iqtisadi və sosial baxımdan Azərbaycan dünyaya yeni inkişaf modelini təqdim etmişdir. Zəngin iqtisadi potensialı və əlverişli geosiyasi mövqeyi də ölkəmizin müstəqilliyinin möhkəmləndirilməsi və dövlətçilik mənafelərinin qorunmasında mühüm əhəmiyyət kəsb edir. Müstəqil Azərbaycan Prezident  İlham Əliyevin milli maraqlara əsaslanan məqsədyönlü və müdrik siyasəti nəticəsində bu gün iqtisadi inkişafına görə dünyada Lider mövqeyindədir. Sözlə əməlin vəhdətinə əsaslanan Azərbaycanın öz gücünə söykənən müstəqil siyasəti xarici təhdidlərdən, beynəlxalq şəraitdən asılı olmayaraq ölkəmizi sürətlə irəli aparır, dinamik və hərtərəfli inkişaf tempi qorunur, dünyadakı mövqeləri daha da möhkəmlənir. Dünya dövlətləri içərisində ölkəmizin nüfuzunun əhəmiyyətli dərəcədə möhkəmləndirilməsi, dünyanın aparıcı dövlətləri, xüsusilə qonşu ölkələrlə qarşılıqlı əlaqələrin inkişaf etdirilməsi göz önündədir. Beynəlxaq təşkilatların 30 ilə yaxın müddətdə həll edə bilmədiyi Qarabağ münaqişəsini dünya şöhrətli Prezidentimiz xalqımızın sarsılmaz birliyi, Müzəffər Ordumuzun gücü ilə 44 günə həll etdi. Doğma ata – baba torpaqlarından aralı düşən insanların yurd həsrətinə son qoyuldu. Prezidentimiz özünün uzaqgörən siyasəti, diplomatik məharəti nəticəsində qısa müddətdə Azərbaycanı Cənubi Qafqazın lider dövlətinə çevirərək bölgədə yeni reallıqlar yaratdı. Dövlət Başçımız həm bölgənin təhlükəsizliyinin təminatının, həm də inkişaf prespektivlərinin müəyyənləşdirilməsində Liderlik missiyasını çox uğurla gerçəkləşdirdi.

May ayının 27-də Prezident İlham Əliyev və birinci xanım Mehriban Əliyeva Zəngilan rayonunda “Ağıllı kənd” layihəsinin birinci mərhələsi üzrə açılış mərasimində iştirak etdilər. İşğaldan azad olunmuş Zəngilan rayonunun Ağalı kəndində Azərbaycann tarixində böyük əhəmiyyətə malik olan bir tədbir keçirildi. 28 may Dövlət Müstəqilliyi Günü ərəfəsində Ağalı kəndində “Ağıllı kənd” layihəsinin birinci mərhələsi üzrə keçirilən açılış mərasimini “Böyük Qayıdış” prosesinin başlanğıcı hesab etmək olar. Bu eyni zamanda işğaldan azad edilmiş ərazilərdə böyük quruculuq işlərinin sürətlə davam etdirilməsinin göstəricisidir. İlk pilot layihə olaraq burada 200 evdən ibarət gözəl bir “ağıllı kənd” salınıb. Kənddə məktəb, tibb məntəqəsi, məşğulluq, sosial və digər xidmətlər göstəriləcəkdir. Burada daha 150 mənzilin inşası nəzərdə tutulur ki, bunlar da iki mərtəbəli və üç mərtəbəli yaşayış binalarından ibarət olacaqdır. Müzəffər Ali Baş Komandan, cənab Prezident İlham Əliyevin rəhbərliyi altında belə layihələrin həyata keçirilməsi ondan xəbər verir ki, işğaldan azad edilmiş bütün torpaqlarımız tezliklə çiçəklənən bir diyara çeviriləcəkdir.