26 sentyabr 2022-ci il tarixdə 27 sentyabr Anım Günü ilə əlaqədar YAP Qazax rayon təşkilatında tədbir keçirildi.
    Tədbir iştirakçıları əvvəlcə Qazax şəhərinin mərkəzindəki Şəhidlər Xiyabanında oldular və müqədddəs şəhidlərimizin abidəsi önünə qərənfil dəstələri düzərək onların əziz xatirəsinə ehtiramlarını bildirdilər.
     YAP Qazax rayon təşkilatının inzibati binasında keçirilən tədbiri rayon təşkilatının sədri Anar Nəbiyev açdı.
Müstəqil Azərbaycanımızın və Yeni Azərbaycan Partiyasının memarı və qurucusu Ulu Öndər Heydər Əliyyevin, həmçinin müqəddəs şəhidlərimizin əziz xatirəsi bir dəqiqəlik sükutla yad edildi.
     Qazax rayon İcra Hakimiyyətinin başçısı Rəcəb Babaşov çıxış edərək Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyi ilə 44 günlük Vətən müharibəsində şanlı Azərbaycan Ordusunun misilsiz qələbəsindən,qısa bir müddətdə torpaqlarımızın işğalçılardan təmizlənməsindən, xalq - ordu birliyindən, lider - xalq sevgisindən və möhtərəm Prezidentimiz və Heydər Əliyev Fondu tərəfindən şəhid ailələrinə, qazilərə göstərilən diqqət və qayğıdan ətraflı danışdı. 
    Sonra YAP Qazax rayon təşkilatının sədri Anar Nəbiyev geniş məruzə ilə çıxış etdi.Rayon təşkilatının sədri bildirdi ki, iki il bundan əvvəl sentyabr ayının 27-si şanlı qələbəmizin təməlinin qoyulduğu gündür.Xalqımız 44 gün ərzində möhtəşəm Zəfərə imza atmaqla dünya hərb tarixinin yeni qızıl səhifəsini yazdı. Bu Qələbə xalqımızın və Ordumuzun gücünü,milli birliyini,vəhdətini, mübarizliyini bütün dünyaya sübut etdi.Azərbaycan xalqı hər zaman qəhrəman övladlarının xidmətlərini yüksək qiymətləndirir,bütün şəhidlərimizin ruhuna hörmət və ehtiram göstərir,əziz xatirəsini uca tutur. Zəfərlə nəticələnən 44 günlük Vətən Müharibəsindən az sonra respublikamızda Anım Gününün təsis edilməsi haqqında Azərbaycan Respublikası Prezidentinin Sərəncamı tarixi bir sənəd olmaqla yanaşı,həm də şəhidlərimizin əziz xatirəsinə sonsuz ehtiramın bariz nümunəsidir.
     Daha sonra BDU Qazax filialıının tələbəsi Aydan Əsgərova, partiya fəalı, şair Kazım Kazımlı,Qazax rayon Gənclər İnkişaf Mərkəzinin direktoru Gövhər Rəhimova çıxış etdilər.
     Tədbirin sonunda Qazax rayon Gənclər İnkişaf Mərkəzinin şagirdləri vətənpərvərlik ruhunda ədəbi-bədii kompozisiya göstərdilər.