21 dekabr 2023-cü il  tarixində  xalqımız daha bir  tarixi hadisəyə şahidlik etdi. Ölkəmizin tarixində ilk dəfə olaraq  işğaldan azad edilmiş ərazilərdə futbol matçı keçirildi. Xankəndi stadionunda futbol üzrə Azərbaycan Kubokunun 1/8 final mərhələsində Ağdamın “Qarabağ” və Bakının MOİK komandaları qarşılaşdı.
     Oyun başlamazdan əvvəl Möhtərəm  Prezidentimiz cənab  İlham Əliyev  cəmi iki ay ərzində yenidən inşa edilən Xankəndi stadionunda çıxışı zamanı qeyd etdi ki,bu futbol matçının Xankəndidə keçirilməsinin çox böyük mənası var. Xankəndi qədim Azərbaycan diyarıdır. Bu kəndin təməli Qarabağ xanı tərəfindən qoyulmuşdur və ondan sonra Azərbaycan Respublikasının vəsaiti hesabına Azərbaycan memarları, inşaatçıları tərəfindən böyük bir şəhər yaradılmışdır. Əfsuslar olsun ki, 30 il ərzində bu şəhərdə separatçılar yuva salmışdılar. Bu şəhər separatizmin rəmzinə çevrilmişdi. Torpaqlarımızı 30 il ərzində işğal altında saxlayan Ermənistan hesab edirdi ki, bunu əbədi edə biləcək. Biz, şanlı Azərbaycan Ordusu onlara və bütün dünyaya sübut etdik ki, bu, bizim tarixi, əzəli torpağımızdır. Bu torpaqların sahibləri bizik, Azərbaycan xalqıdır. Biz buraya qayıtmalı idik və qayıtmışıq. Ölkə başçısının söylədiyi kimi, üç ay bundan əvvəl Xankəndi işğaldan azad edildi. Birgünlük antiterror əməliyyatı nəticəsində Azərbaycan öz dövlət suverenliyini tam təmin etmişdir, bu gün bütün Qarabağ bölgəsində Azərbaycan Bayrağı dalğalanır. 
   Əbədi qürur mənbəyimiz hesab edilən Qarabağın azad olunması böyük tarixi hadisədir və bu tarix bizim qəlbimizdə əbədi yaşayacaq. Azərbaycan xalqı, dünya azərbaycanlıları bu Zəfər ilə bundan sonra əbədi fəxr edəcəklər. Dövlət başçısının vurğuladığı kimi, quruculuq-abadlıq işləri bütün Qarabağda, Xankəndi şəhərində, Xocalıda işğaldan azad edilmiş digər ərazilərdə geniş şəkildə aparılır. Xankəndi stadionuna gəlincə stadion cəmi iki ay ərzində yenidən inşa edilmiş, əsaslı təmir olunmuşdur. Separatizmi əks etdirən bütün yazılar isə tarixin zibilxanasına atılmışdır. Ölkə rəhbəri onu da qeyd etdi ki, bütün başqa şəhərlər kimi, bu gün Ağdam şəhəri də yenidən qurulur. Bir neçə aydan sonra Ağdam şəhərində “İmarət” stadionunun yenidən inşa edilməsinə başlanılacaq.
   Dövlət başçısı daha sonra bildirdi ki, “Qarabağ” və Bakının MOİK oyunun nəticələrindən asılı olmayaraq qalib bəllidir. Qalib Azərbaycan xalqıdır, Azərbaycan dövlətidir! “Qarabağ” və Mərkəzi Ordu İdman Klubunun qarşılaşması həqiqətən də böyük rəmzi məna daşıyır.
Zəfərimizin mənbəyinə gəlincə isə ölkə başçısı qeyd etdi ki, Qarabağ–Ordu-Xalq birliyi bizim Zəfərimizin əsas mənbəyidir. Bununla da xalqımız bütün dünyaya sübut etdi ki, Qarabağ Azərbaycandır! Dörd il bundan əvvəl isə Xankəndi stadionunda bəziləri “Qarabağ Ermənistandır və nöqtə” demişdilər. Müasir tariximizin Zəfər səhifələri kimi üç ay bundan əvvəl - sentyabrın 19-20-də Xankəndi, Xocalı, Əsgəran, Xocavənd, Ağdərə rayonları da işğalçılardan azad edildi. Oktyabrın 15-də bütün bu şəhərlərdə Azərbaycan Bayrağı ucaldıldı. Noyabrın 8-də Xankəndinin mərkəzi meydanında Zəfər paradı keçirildi. Yaşasın Qarabağ! Yaşasın şanlı Ordumuz! Qarabağ Azərbaycandır! Bundan sonra bütün Qarabağ torpaqlarında Azərbaycan Bayrağı əbədi dalğalanacaq. Azərbaycanlılar bu torpaqlarda əbədi yaşayacaq!

Anar Nəbiyev
YAP Qazax rayon təşkilatının sədri