"Mən yer üzündə müəllimdən yüksək ad tanımıram"

Müəllim yalnız dərs deyən, sadəcə bir-iki saat sinif otaqlarında şagirdlərlə təmasda olan bir şəxs, adi tərbiyəçi deyil. O, zaman və gənclik arasında körpü yaradan, öz şəxsiyyəti ilə nümunə göstərən, sabahın qurucularını hazırlayan, millətin gələcəyi üçün böyük məsuliyyət daşıyan bir varlıqdır.
Müəllim sözü müqəddəs deyil, müqəddəs olan müəllimlikdir. Yəni müqəddəs olanlar öz vəzifələrini layiqincə yerinə yetirən insanlardır. Müəllim gənc nəslin formalaşmasında böyük rol oynayır. Uşaq ikən bizə qələm tutub yazmağı öyrədən, hər il keçdikcə öz bildiklərini bizimlə bölüşən dəyərli varlıqlardır müəllimlər!!!
Müəllimlər cəmiyyətin memarlarıdır desək, yəqin ki, səhv etmərik. Bu danılmaz bir həqiqətdir ki, hər kəsin layiqli vətəndaş kimi formalaşmasında müəllimlərimizin əvəzsiz xidmətləri vardır.

Ümummilli liderimiz Heydər Əliyev həmişə müəllim əməyini yüksək qiymətləndirirdi. Dahi şəxsiyyət öz müəllimlərini minnətdarlıqla xatırlayar, onların xidmətləri haqqında ürəkdolusu danışardı. Ulu Öndər ölkəmizə rəhbərlik etdiyi bütün dövrlərdə həmişə müəllimə hörmət və ehtiramla yanaşıb, onların maddi rifah halının qayğısına qalıb.
Ulu Öndərimiz demişdir: - "Mən yer üzündə müəllimdən yüksək ad tanımıram. Hər birimizdə müəllimin hərarətli qəlbinin bir zərrəciyi vardır. Məhz müəllim doğma yurdumuzu sevməyi, hamının rifahı naminə vicdanla işləməyi müdrikliklə və səbirlə bizə öyrətmiş və öyrədir. Hər birimizin öz müəllimi vardır və biz bütün ömrümüz boyu onun xatirəsini hörmətlə, minnətdarlıqla qəlbimizdə yaşadırıq".
Hər birimiz üçün müəllim doğma və əzizdir. Çünki müəllim bizə təhsil verir, dərs öyrədir, yol göstərir, daim qayğımıza qalır. Buna görə də müəllimlərimizi böyük ehtiram və hörmətlə xatırlayırıq. Öyrəndiklərimizə görə həmişə onlara minnətdarıq.
Bu baxımdan ibtidai sinif müəllimlərinin işi daha çətin, daha şərəflidir. Onlar körpələrimizin anadan sonra gördükləri, inandıqları varlıqlardır. Məhz körpələrimizin ilk addımlarının doğru yönləndirilməsi kimi məsuliyyətli addımın atılması bilavasitə onların üzərinə düşür.

Belə müəllimlərdən biri də Abşeron rayonu, Mehdiabad qəsəbə 3 nömrəli tam orta məktəbdə ibtidai sinif müəllimi işləyən Hüseynli Jalədir. Jalə müəllim(ə) keçirilən sertifikasiya imtahaninda 50 ixtisas sualının hamısına düzgün cavab yazaraq 100 faiz nəticə göstərib.
Jalə müəllim(ə) işlədiyi məktəbin müəllim və şagird kollektivinin dərin hörmətini qazanıb.
Balaca fidanlara doğma ana qayğısı göstərən Jalə xanım dərs dediyi körpələrə elmlə yanaşı doğma yurdumuzu sevməyi, hamının rifahı naminə vicdanla işləməyi müdrikliklə və səbirlə öyrədir.