"Onkoloji xəstəlik qorxulu deyil, sağalan xəstəlikdir, bunun üçün həkimlə dostluq etmək lazımdir" - Elçin Mansurov

Onkologiyaya dair çoxsaylı elmi məqalələrin müəllifi olan Elçin Mansurovun araşdırmaları beynəlxalq elmi jurnallarda dərc edilib. Müxtəlif ölkələrdə keçirilən konqres və simpoziumlarda Azərbaycan elmini təmsil edib, dünyanın aparıcı mütəxəssisləri ilə təcrübə mübadiləsi aparıb.

2025-ci ildə Türkiyədə keçirilən beynəlxalq onkologiya konqresində birinci yer Azərbaycanı təmsil edən onkoloq, tibb üzrə fəlsəfə doktoru Elçin Mansurova verildi.

Maraqlıdır ki, Elçin Mansurov qazandığı pul mükafatı - 25 min Türkiyə lirəsi ilə deyil, verdiyi qərarla yadda qaldı.

O, mükafat kimi aldığı pul vəsaitini Azərbaycanda onkoloji xəstə uşaqların müalicəsinə bağışladı. Və qərara alındı ki, gələcəkdə elmi fəaliyyət nəticəsində əldə ediləcək mükafatlar və digər gəlirlər də uşaq onkologiyasının inkişafına yönəldiləcək.

Bu qərar ani emosiyanın nəticəsi deyildi. Onu yaxından tanıyanlar yaxşı bilirlər ki, Elçin Mansurov üçün elm heç vaxt yalnız elmi uğur qazanmaq vasitəsi olmayıb.

Bütün bunlarla yanaşı, sağlam qidalanma, həyat tərzi, bağırsaq mikrobiomu, profilaktika və uzunömürlülük mövzuları da illərdir araşdırmalarının əsas istiqamətlərindəndir.

Akademik Cəmil Əliyevin təşəbbüsü və rəhbərliyi ilə hazırlanmış “Qidalanma və digər amillərlə onkoloji və yanaşı gedən xəstəliklərin əlaqəsi. Süni intellekt əlavə nə deyir?” adlı, əvvəlcə cəmi iki yüz səhifə kimi nəzərdə tutulan layihə zaman keçdikcə iki min səhifədən artıq həcmə malik sanballı elmi əsərə çevrilib.

Azərbaycan Endoskopik-Laparoskopik Cərrahlar Cəmiyyətinin sədri Müşfiq Həsənovun fikrinə görə bu nəşr təkcə kitab deyil, həm də elmi mənbədir: “Burada həm elmi, həm də praktik nəticələr, öz tədqiqatlarımız əksini tapıb. Beynəlxalq yanaşmalarda son illərdə onkoloji xəstəliklərin müalicəsində yalnız kimyəvi terapiya və əməliyyat deyil, qidalanma da mühüm yer tutur. Bu baxımdan kitab olduqca əhəmiyyətlidir”.

Bundan öncə Əməkdar həkim Elçin Mansurovun “Kim üzr istəməlidir?” adlı kitabı da işıq üzü görüb. Çox sayda tarixi kitablar çap olunsa da Elçin Mansurovun yazdığı bu kitab bu günkü Azərbaycanımızın Azadlıq işığı ilə nurlanıb, 44 günə qələbə sevincinin, Şəhidlərimizin sevərək canlarını qurban verməsi və qazilərimizin fədakarlığı nəticəsində ucaldığı və Dəmir Yumruqlu, Ali Baş Komandanımızın xalqımızla birgə Zəfər Bayramını qürurla qeyd etməsi haqqında yazılıb.

Elçin Mansurovun həyatı təkcə bir həkim həytı deyil. Onun həyatı həkimliklə yanaşı həm də təcribəsini, elmini kitablarıyla gələcəyə çatdırmaq, yeni nəsil həkimlər yetişdirmək, qazandığını cəmiyyətlə bölüşmək və insanlara sağlam həyatın dəyərini anlatmaqdır. Həkimin ən böyük gücü yazdığı reseptdə deyil, xəstəsinə verdiyi inamda olur.