Telekommunikasiya şirkətləri xüsusi rəqəm kombinasiyalarını "qızıl" və ya "platinum" nömrələr kimi təsnif edirlər. Bu telefon nömrələri ya yüksək abunə haqqı qarşılığında təqdim edilir, ya da hərraclar vasitəsilə satılır. Şirkətlər belə nömrələri prestijli müştərilərinə təklif edir. Maraqlıdır ki, çox bahalı telefon nömrələrinin sahibləri adətən anonim qalmağı üstün tuturlar. Belə nömrələr bəzi hallarda satılan məhsulun və ya xidmətin reklamı üçün istifadə olunur.

    Bahalı nömrələr bir investisiya obyekti kimi də istifadə edilir. İnsanlar unikal nömrələri alıb daha yüksək qiymətə satmaq üçün saxlayır. Bu, xüsusilə Yaxın Şərq və Asiya ölkələrində populyardır.

     Bahalı nömrələrin sahibləri təhlükəsizlik məsələlərinə də diqqət yetirirlər, çünki bu nömrələr daha çox spam zənglər və sui-istifadə riskinə məruz qalır.

     Dünyanın bu günədək ən bahalı mobil telefon nömrəsi 666-6666 olmuşdur. Bu nömrə 2006-cı ildə Qətərdə Telecom (Ooredoo) tərəfindən keçirilən hərracda rekord məbləğ olan 2,75 milyon dollar qarşılığında bir anonim alıcıya satılmış, hərracı təşkil edən mobil operator satışdan əldə olunan gəliri xeyriyyə məqsədləri üçün sərf etmişdir. Bu da həmin dövrdə hərraca olan marağı daha da artırmışdır. Qeyd edək ki, bu nömrə yalnız telekommunikasiya tarixində deyil, həm də xeyriyyə tədbirlərində rekord məbləğə satılan simvolik bir obyekt kimi diqqət çəkir.

       Sözügedən nömrənin bu qədər bahalı olmasının səbəbi isə onun çox unikal, mükəmməl simmetriya və yadda qalan kombinasiyaya malik olması olmuşdur. 

     Maraq üçün onu da qeyd edək ki, dünyada çox baha qiymətə satılan başqa mobil nömrələr də olmuşdur. Bunlardan biri 8888-8888 nömrəsidir. Bu nömrə 1990-cı illərdə Çində bir iş adamına 280 min dollar qarşılığında satılmışdır. Bunun səbəbi isə Çində "8" rəqəminin zənginliyi və uğuru simvollaşdırmasıdır. Buna görə bu rəqəmlərdən ibarət nömrələr çox bahalı olur.

     Çində 0123456789 nömrəsi də bir dəfə 1,3 milyon dollar qiymətinə satılmışdır. Bu nömrə sadə və simmetrik olduğu üçün insanların diqqətini çəkir. Bu ölkədə 999-9999 nömrəsi də eyni qiymətə, yəni 1,3 milyon dollar qiymətinə satılmışdır. "9" rəqəmi "uzun ömür" və "mükəmməllik" simvoludur və bu tipli nömrələrə də olan tələbat yüksəkdir.

     Digər bahalı nömrə kimi ABŞ-da 777-7777 nömrəsinin 2000-ci illərdə hərracda satıldığı və yüksək məbləğə sahib olduğu deyilir. "7" rəqəmi bir çox mədəniyyətdə uğur rəmzi hesab edilir.

        ABŞ-da 555-5555 nömrəsi də çox məşhurdur və müxtəlif filmlərdə, televiziya şoularında və reklamlarında istifadə edilmişdir. Bu nömrə, daha çox simvolik dəyərə malik olub, əksər hallarda "dummy" (yəni real olmayan) nömrə olaraq verilir. Bununla belə, əslində də çox bahalı təkliflərə satılabilən bir nömrədir.

      Bundan başqa, BƏƏ-də 050-7777777 nömrəsi bir hərracda 2,2 milyon dollara satılmışdır. 

      666-666 nömrəsi isə Pakistanın Mobilink telekommunikasiya şirkəti tərəfindən 1,8 milyon dollar qarşılığında satılmışdır. Buradakı "666" rəqəmi dünyada bəzi mədəniyyətlərdə mənfi bir işarə olsa da, bu nömrə Pakistan bazarında yüksək tələbat görmüşdür.

       Hindistana gəldikdə, bu ölkədə 121-121 nömrəsi çox məşhurdur və təxminən 1 milyon dollar qiymətinə satılmışdır. Buradakı "121" nömrəsi sadəliyi və unikal formasını qiymətləndirən insanlar tərəfindən çox dəyərləndirilir.

      Siyahını uzatmaq fikrimiz yoxdur. Sonda deyə bilərik ki, dünyada rəqəmlərin mədəni və simvolik mənaları, telekommunikasiya sektorundakı rəqabət və müştərilərin fərdiləşdirilmiş tələbləri bahalı telefon nömrələrinin fenomen olaraq qalacağını göstərir. Bu, texnologiyanın yalnız funksionallıq deyil, həm də şəxsiyyət və sosial mövqe ilə əlaqələndirildiyini nümayiş etdirir.

Yunis Xəlilov, 

Hüquqşünas