Oğul övladını gözəl yetişdirilməsi ilə bağlı tövsiyələr dedikdə, ilk olaraq ağıla ABŞ-ın 16-cı prezidenti Avraam Linkolnun oğlunun müəlliminə yazdığı məktubu gəlir. Bəli, bu, çox ibrətamiz bir məktubdur və hər kəsin oxuması vacibdir.

       Lakin bu məktub qədər oxunmasını tövsiyə etdiyim digər bir faydalı əsər daha vardır. Bu da ABŞ-ın məşhur hərbi liderlərindən biri olan general Douglas MacArthurun oğluna yazdıgı vəsiyətidir.

      Qeyd edək ki, Duqlas MakArtur (26 yanvar 1880 – 5 aprel 1964), İkinci dünya müharibəsində sakit okean cəbhəsində müttəfiq qüvvələrinə komandanlıq edən amerikalı 5 ulduzlu "Ordu Generalı" (ingiliscə "General of the Army", Avropa ordularındakı qarşılığı marşal rütbəsidir) olmuşdur. Müharibədən sonra Yaponiyadakı Müttəfiq işğal qüvvələrinin komandanı kimi bu ölkəni idarə etmiş və Koreya müharibəsinin ilk doqquz ayında Birləşmiş Millətlər Təşkilatının qüvvələrinin komandanı olmuşdur.

       Onun oğluna yazmış olduğu vəsiyətin hər kəs tərəfindən oxunmasının faydalı olacağını düşünürəm. Təəssüf ki, bu vəsiyyətə Azərbaycan dilində rast gəlmədim. Ona görə də həmin vəsiyyətin mətnini ingilis dilindən Azərbaycan dilinə tərcümə edərək Sizinlə bölüşürəm:

"Tanrım mənə elə bir oğul bəxş et ki, 

 Zəif olduğu anın fərqinə varacaq qədər  güclü, 

Qorxduğu zaman özünü toparlaya biləcək qədər cəsur, 

Şərəfli bir məğlubiyyətə uğradıqda qürurlu və mərd,

Lakin zəfər qazandıqda mərhəmətli və təvəzökar olsun.

Mənim elə bir oğlum olsun ki, arzuları həyata keçirdiklərini üstələməsin və elmin təməl daşının "özünü tanımaq" olduğunu qavrasın.

Tanrım, onu asan və rahat yoldan deyil,

Çətin və mübarizə yolundan göndər ki,

Fırtına zamanı ayaqda durmağı öyrənsin,

Bunu bacara bilməyənlərə isə şəfqətli davransın.

Qəlbi təmiz və hədəfləri böyük bir oğul olsun.

Başqalarını idarə etmədən qabaq özünə nəzarət edə bilsin.

Yunis Xəlilov,

Naxçıvan Dövlət Universitetinin

 müəllimi, hüquqşünas