Aşıq sənəti qədimliyi ilə yanaşı, geniş bir tarixi-coğrafiyanı özündə birləşdirir. Milli kimliyimizin təsdiqi olan aşıq sənəti ulu babaların bizlərə bəxş etdiyi ən böyük ərməğandır. Aşıq sənəti də dövrün tələbi ilə altsistemlərə bölünüb.  Zaman-zaman Anadolu, Göyçə, Borçalı, Qarabağ, Dərbənd, Gəncəbasar, Naxçıvan və s. aşıq mühitləri yaranıb.  Bu mühitlərin hər  birinin  öz  tarixi  inkişaf mərhələsi  var. 
    Hər bir aşıq mühiti, adətən, ustad aşıqların adı ilə sıx bağlıdır. Onların  miras  qoyduqları zəngin irs və yetirdikləri şəyirdlər həmin aşıq mühitinin böyüməsinə zəmin yaradıb. Ustad aşıqlar isə canlı bir tarix yaradaraq tarixin aparıcı qəhrəmanları  olublar. 
    Saz əsrlərlə xalqın danışan haqq səsi olub. Zülmə, ədalətsizliyə və s. insan  xilqətinə  zərər verən vəziyyətlərə qarşı düşmən  olan  saz  müqqədəs  hesab  edilmişdir.   Hər bir bölgənin aşıqları müəyyən xüsusiyyətlərlə fərqlənib. Bu, onların  ləhcəsində, təhsilində, ifalarının zənginliyində, səhnə mədəniyyətində və s.  xüsusiyyətlərdə öz əksini tapıb. Danılmaz həqiqətdir ki, aşıqlar  bizim  çoxəsrlik  tariximizdə musiqi mədəniyyətinin ən ünlü simaları olublar. 
   Bu il   Azərbaycan aşıq sənətinin görkəmli nümayəndələrindən olan  ustad aşıq Camoy Qurbanovun 70 yaşı tamam olur. Hər zaman  ustad aşıqlara böyük qayğı və diqqət göstərən Azərbaycan Aşıqlar  Birliyində  C.Qurbanovun yubileyinin yüksək səviyyədə qeyd  olunması  ilə bağlı da bir sıra tədbirlər nəzərdə tutulur. Bu silsilədən ilk tədbir kimi Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlının aparıcılığı ilə “Mədəniyyət” kanalında hər həftə efirə gedən “Saz-söz axşamı” verilişinin bir buraxılışının bütövlükdə bu ustad sənətkara həsr ollunması nəzərdə tutulmuşdu. İyul ayının 19-da ustadın özünün iştirakı ilə  həmin  verilişin çəkilişi baş tutdu.  Çəkiliş zamanı  professor
 Məhərrəm  Qasımlının  təqdimatında  ustadın ömür və sənət  yolundan söhbət açıldı. Camoy Qurbanov  çıxış edərək bu günkü yubiley tədbirinə və onun yaradıcılığına verilən yüksək qiymətə görə başda ölkə başçısı və Birinci vitse-prezident olmaqla  Azərbaycan Televiziyasına və Aşıqlar Birliyinə  dərin minnətdarlığını bildirərək tədbirin ərsəyə gəlməsində əməyi keçən hər kəsə təşəkkür etdi və "Kərəm gözəlləməsi" aşıq havasını ifa etdi.  Yubilayarın sənət dostları və gənc aşıqlardan Hüseyn (Hüsən) Şəmistanoğlunun ifasında "Mixəyi",  Avdı Musayevin ifasında "Mirzəcanı" , Şahin Süleymanovun ifasında" Ruhani",   Kifayət Nəbiyevanın ifasında "Dübeyti", Mahal İncəlinin ifasında "Yurd yeri",  Murad Nəbiyevin ifasında "Şahsarayı", Ruslan İbrahimoğlunun  ifasında "Koroğlu dübeytisi" aşıq havaları ifa olundu.  Hüseyn Şəmistanoğlu və Kifayət Nəbievanın birgə ifa etdikləri" Kərəmköçdü" havası xüsusilə fərqləndi. Çəkilişin sonunda  professor Məhərrəm Qasımlı yubilyarı təbrik edib, ustada yeni-yeni sənət uğurları arzu etdi.