29 avqust 2023-cü il tarixində Balakən rayonu Mədəniyyət Mərkəzində rayon yazarları ilə görüş keçirilib. Görüşdə rayonun "Çeşmə" ədəbi birliyinin sədri Nəfisət Vahid, jurnalist Zeynəddin Həsənli, yazıçı-jurnalist Aygün Sadiq, şairlərdən Rəşad Balakənli,  Anar Xəyal,  Şöyüb Mikayılov, Sədulla Şirinov və digər qələm sahibləri, gənc və yaşlı nəslin nümayəndələri, radio diktor, qiraətçi Zümrüd Dibirova, şəhid ailəsi, həmçinin RİH nümayəndəsi, rayon Mədəniyyət Mərkəzininin rəhbərliyi və işçi heyyəti iştirak edib. 
     Görüşdə tədbiri giriş sözü ilə açan,  AYB-nin regional bölgəsinə yeni təyin olunmuş sədri, jurnalist Əlmaniz Ələkbərli uzun illər fəaliyyət göstərdiyi rayonda istedadlı şair və yazıçıların olduğunu, lakin onların müəyyən səbəblərdən diqqətdən kənarda qaldığını qeyd edib.  O, gələcək fəaliyyətində qələm sahiblərini ölkədə və ölkədən kənarda tanıtmaq üçün əlindən gələni edəcəyini vurğulayıb. 
    Çıxış edən yazarlar da öz növbəsində yeni sədri təbrik edib, onun Zaqatala, Qax və Balakəndə uzun illər həm mətbuat,həm ədəbiyyat adamı olaraq təmənnasız müsbət fəaliyyətini, rayon ictimaiyyətinə verdiyi töhfələri diqqətə çatdırıblar. Həmçinin onu da qeyd ediblər ki, Əlmaniz Ələkbərli regionun şəhidlərinə bir neçə kitab həsr edib və şəhid ailələrinə diqqət və qayğı göstərib. 
Səmimi şəraitdə və müsbət ortamda keçirilən görüş çay süfrəsi və xatirə şəkilləri ilə yekunlaşıb.

 
Aygün Sadiq,
  ATİA.AZ