Ölümü ilə ölümsüzlük qazanan ŞƏHİDİMİZ - Qəfarov Rəvan Elxan oğlu

“Allah yolunda öldürülənlərə (şəhid olanlara) “ölü” deməyin. Əksinə, onlar (Allah dərgahında) diridirlər, lakin siz bunu dərk etmirsiniz”. - (Bəqərə surəsi, 2/154)

Keçirdiyimiz hər gün tarixə dönür. Tarixə yazılan günlərin hamısı yaddaqalan olmur. Elə günlər var onlar unudulub gedir, elələri də var ki, onlar heç vaxt unudulmur, yaddan çıxmır. Belə günləri unudulmaz edən qəhramanlardandır şəhidlər. Çünki, bu dünyada hamımıza bəxş olunan bir ömür payı var. Ömür yolunu müəyyən müddət sonra başa vuracağıq. Bu mənada insanın dünya həyatına ən gözəl şəkildə əlvida deməyinin adıdır şəhid olmaq.
Allah, vətən və millət yolunda öz istəyi ilə canından keçməyə razı olan insanların fəth elədiyi ən yüksək, şərəfli zirvədir şəhid olmaq.
Xalq tərəfindən qərinələr, əsrlər keçməyinə baxmayaraq əsla unudulmayan insanlardır şəhidlər.
Tarix boyu inanan millətləri zəfərdən zəfərə aparan səbəb də vətənə xidmət etmək və şəhid olmaq arzusu olmuşdur.
Canlarından keçməklə xalqın qəhrəmanlıq dastanını, azadlığını canı ilə qazanıb qanı ilə yazanlardır şəhidlər.
Məhz onların canı və qanı hesabına qazandıqları azadlıq və müstəqillik xalq tərəfindən heç vaxt unudulmur. Ona görə ki, şəhidlər xalqın kimliyini, mənliyini qoruyan insanlardır.
Onlar bir xalq qəhrəmanı olaraq zəncirləri qıraraq, zülmətləri yararaq, xalqı işıqlı sabaha aparan, ölümləri ilə ölməzlik qazanan əbədiyyətə qovuşmuş bəxtiyar insanlardır.
Ölüm əslində yoxluq və heçlik deyil. Əbədi diyara səfərdir. Əbədi diyara səfərdən sonra çoxları çox az müddətlik də olsa dünyaya yenidən qayıtmaq və xeyirxah, saleh əməllər işləmək istəyəcəklər. Ancaq şəhidlər yenidən dünyaya qayıdaraq bir daha şəhid olmağı arzulayacaqlar.
Ölümü ilə ölümsüzlük qazanan ŞƏHİDlərimizdən biri də Qəfarov Rəvan Elxan oğludur.
Qəfarov Rəvan Elxan oğlu 1991-ci ildə Ağstafa rayonunun Dağkəsəmən kəndində anadan olmuşdur. 1997-2008-ci illərdə Dağkəsəmən kənd 1 saylı orta məktəbdə təhsil alan Qəfarov Rəvan 2009-cu ildən "N"saylı hərbi hissəyə xidmətə getmişdir. 2010-cu ildən baş gizir rütbəsində çalışan qəhrəmanımız döyüşlər başlayan gündən cəbhə bölgəsinə yollanıb. 2020-ci ilin 29 oktyabrında Fizuli rayonunun Veysəlli kəndində gedən döyüşlərdə şəhid olmuşdur. İşlədiyi müddətdə "Qüsursuz xidmətə görə" , Milli ordunun yaranmasının 95 illik və 100 illik yubiley medalları ilə təltif edilmişdir. Şəhadətindən sonra "Vətən uğrunda" , "Döyüşdə fərqlənməyə görə" və "Fizulinin azad olunmasına görə" medalları ilə təltif edilmişdir.
Azərbaycan Ordusunun baş giziri Qəfarov Rəvan Elxan oğlu doğulduğu Ağstafa rayonunun Dağkəsəmən kəndində dəfn olunmuşdur.
Allah rəhmət eləsin!!! Məkanı cənnət olsun!!!

İnsan insan olur öz hünəriylə.
Millət, millət olur xeyri, şəriylə,
Torpağın bağrına cəsədləriylə,
Azadlıq tumunu əkdi Şəhidlər.
Bəxtiyar Vahabzadə

Tarix: 30-10-2021, 15:19 Oxunub: 804